Páskaeggjaratleikur 2020

Svo lengi sem ég man eftir mér hafa páskaeggin verið falin á mínu heimili og Páskadagsmorgun hófst svo á því að gera heljarinnar leit um allt húsið.

Þar sem æskuheimilið okkar er virkilega ofhlaðið dóti, skrautmunum og dúlleríi út um allt þá voru felustaðirnir endalausir og svo var sagt "heitt og kalt" eftir því hversu nálægt við vorum.

Við systkinin földum egg mömmu og pabba og þau okkar. Við vorum vanalega mun kvikindislegri í vali á felustöðum og sérstaklega við eggið hans pabba (ég veit ekki hvenær hann dró stutta stráið) en egg mömmu og pabba urðu sífellt minni með árunum (mamma stjórnaði þessu) svo möguleikarnir voru endalausir!

Ég man að eitt árið var innvolsið úr heilu samlokubrauði fjarlægt og egginu komið fyrir í staðinn. Skorpan faldi svo eggið vel og á meðan pabbi var að verða gráhærður beið brauðhleifurinn allan tímann á bekknum sali rólegur! Ég man að hann horfði svo á brauðið því hann var alltaf viiiiirkilega heitur nálægt brauðinu og leit á okkur og sagði "á ég að trúa þessu uppá ykkur"?! -jebb!!

Annað árið fengum við svipaða hugmynd nema með símaskrá þar sem við skárum egglaga gat úr allri skránni (þið sjáið samt að eggin voru orðin tíkarlega lítil.. comon mamma!).

Eitt árið var eggið tekið og brotið og troðið ofan í hitakönnu, það var frekar mikið bras og ekkert sérstaklega vinsælt...

Annað árið var egginu komið fyrir ofan á ljósakrónu- það árið fékk pabbi súkkulaðihúðaðan málshátt...

Eitt árið var eggið tekið og fest á band, það var svo strengt út fyrir gluggann og egginu var slakað út, þar fékk það að dúsa alla nóttina.. það árið fékk pabbi frosinn málshátt...

Þetta var svona upp og ofan en eins og þið sjáið þá fylgdu þessu algjörlega ógleymanlegar minningar! Ég efa það ekki að þessi hefð sé þekkt á mörgum heimilum og hef ég einnig heyrt sögur af flóknum ratleikjum með vísbendingum um allt hús og tilheyrandi veseni sem krefst mikils undirbúnings og vinnu.

Svo til að skapa enn fleiri páskaminningar og svona þar sem ég hef einstaklega gaman að veseni og vinnu og hef aldrei nokkuð að gera annars, þá datt mér í hug að búa til páskaeggjaleit sem allir geta notað á sínu heimili.

Þetta var svolítið bras fyrir mig en ósköp einfalt fyrir ykkur svo ég vona að sem flestir geti nýtt sér þetta!

Páskaeggjaratleikur!

Meðfylgjandi eru 6 vísbendingar.

Þær eru í formi vísna sem mamma kom mjög sterk inní að setja saman, klöppum fyrir henni!

Vísbendingarnar benda á 6 svæði sem ættu að finnast á öllum heimilum:

Stofan eða sjónvarpsherbergið

Eldhúsið

Forstofan

Baðherbergið

Póstkassinn/póstlúgan

Rúmið (barnsins eða þess sem er verið að fela fyrir).

Þið veljið svo algjörlega sjálf í hvaða röð þið viljið gera þetta og hvort þið yfirhöfuð viljið nota allar vísbendingarnar. Það sem er aðalmálið er að velja eitthvað svæði þar sem þið getið falið eggið.

Það hafið þið sem lokavísbendinguna.

Svo fléttið þið vísbendingarnar aftur á bak frá "eggjafelustaðnum" svo þið afhendið fyrstu vísbendinguna og þá ætti allt að ganga upp.

Ég mun útskýra þetta betur aðeins neðar í póstinum!

Nú, til þess að þetta sé ekki alltof einfalt þá er svolítið flækjustig sem fylgir hverri vísbendingu. Ein er skrifuð með dulmáli önnur er skrifuð með speglaskrift, aðra þarf að pússla saman osfrv.

Það er því nauðsynlegt að prenta út vísbendingarnar á þann pappír sem þið veljið ykkur en ég ákvað að hafa þær einfaldlega svarthvítar svo þær henta öllum prenturum. Blöðin geta þó verið í lit eða þið getið dundað ykkur við að lita.. ENDILEGA sendið mér myndir ef metnaðurinn rýkur af stað með ykkur, það væri ekkert nema gaman að sjá það og best væri ef þið merkið myndir á Instagram undir myllumerkinu #systurogmakarpaskar

Vísbendingarnar og staðirnir:

Hjá hverri vísbendingu er mynd sem þarf að prenta út. Stundum eru fleiri en ein og stundum þarf að gera aðeins meira en bara prenta..

Þessi vísbendingin vísar í stofuna eða sjónvarspherbergið.

Þessa vísbendingu á að klippa niður til að búa til púsl. Hafðu í huga að gera það eins flókið eða einfalt og hentar hverjum aldri..

Ég kúri oft á púða

og kíki á góðan þátt

um pilt og stúlku prúða

sem passa saman brátt.

Myndina hér að ofan getur þú vistað og prentað út.

Þessi vísbendingin vísar í eldhúsið.

Hér þarf að leysa dulmál og það er gert með dulmálslykli sem fylgir með. Hér á því að fela tvö blöð. Þau geta verið falin saman eða á sitthvorum staðnum á sama svæðinu til að flækja enn meira fyrir...

Ég fæ mér mjólkursopa

og matarbita oft.

Rétt á eftir ropa

ef gleypt ég hefi loft.

Myndirnar hér að ofan getur þú vistað og prentað út.

Þessi vísbendingin vísar í forstofuna.

Þessa vísbendingu er best að lesa ef henni er snúið í átt að spegli- sjáðu hvort viðkomandi tekst að fatta það áður en hann reynir að snúa blaðinu eða lesa í gegnum glugga (sem er reyndar líka vel hægt ef prentað er á venjulegan prentpappír!)

„Enginn inn á skítaskóm“,

skammast einhver þá,

og æpir eitthvað æstum róm;

„ekki þetta má“.

Myndina hér að ofan getur þú vistað og prentað út.

Þessi vísbendingin vísar á baðherbergið.

Þetta er einfaldlega stafarugl, ljóðið er falið inn á milli stafana en glöggir lesendur sjá að fyrsti stafurinn í hverju orði er bæði skáletraður og feitletraður...

Ég þvæ mér þar í framan

og þurrka eftir þvott.

Það þykir fæstum gaman

þó geri það mér gott.

Myndina hér að ofan getur þú vistað og prentað út.

Þessi vísbendingin vísar í póstkassann/póstlúguna.

Þessa vísbendingu þarf að prenta út og klippa svo eftir línunum í 9 jafnstóra bita.

Hér er gott að hugsa um aldur þess sem er að leita.. nú ef um er að ræða glögga og mjög leikglaða krakka/fullorðna þá er um að gera að fela hvern bút á sitthvorum staðnum á þessu svæði- 9 felustaðir í allt. Ef um er að ræða yngri krakka er hægt að fækka stöðunum eða fela alla bitana saman í einu umslagi.

Þau skjótast hingað skeytin

og stöku sinnum blöð.

Hefst þá heljarleitin

heljarmikil kvöð.

Myndina hér að ofan getur þú vistað og prentað út.

Þessi vísbendingin vísar í rúmið þitt.

Hér er vísbendingin völundarhús sem þarf að byrja á því að leysa, það segir þér á hvaða orðum kvæðið endar og þá ætti að vera hægt að finna næstu vísbendingu!

Er vesöld tekur völdin

ég vind mér bara í kúr,

það gerist oft á kvöldin

þá gjarnan þarf ég lúr.

Hvernig fléttum við leikinn rétt?

Nú tökum svo sem dæmi að þú ákveðir að fela páskaeggið í eldhúsinu.

Þá er eldhúsvísbendingin (dulsmálslykillinn) síðasta vísbendingin sem "leitarinn á að finna".

Þá er einfaldlega þitt að velja hvernig þú vilt raða niður restinni af stöðunum og þetta getur farið eftir því hvernig heimilinu er upp raðað.. viltu að "leitarinn" fari fram og til baka á milli rýma eða nokkuð skipulagt á milli..

Segjum sem svo að við ætlum bara að raða þessu niður svona:

1:Rúmið - 2: forstofan - 3: baðherbergið - 4: stofan - 5: pósturinn -

6: eldhúsið (og þar er eggið falið!)

Það þýðir að þú byrjar á því að rétta "leitaranum" vísbendinguna sem vísar í (1)rúmið (völundarhúsið).

Í/hjá rúminu finnur leitarinn vísbendinguna sem vísar í (2) forstofuna (speglaskriftin).

Í forstofunni felurðu vísbendinguna sem vísar í (3) baðherbergið (stafaruglið).

Á baðherberginu er falin vísbendingin sem vísar í (4) stofuna (eggjapúslið).

Í stofunni felurðu vísbendinguna sem vísar í (5) póstinn (9 bita púslið)

og að lokum felurðu hjá póstinum vísbendinguna sem vísar í (6) eldhúsið og það er þá loka felustaðurinn þar sem eggið ætti að vera falið!

Þá ætti þetta vonandi allt saman að ganga upp og allir fara sælir inn í þessa líklega furðulegustu páskahátíð fyrr og síðar!

Ég og við öll hjá Systur&Makar og Volcano Design óskum ykkur gleðilegrar hátíðar og vonum að þið hafið það sem allra best!

Ef þið vilduð vera svo væn að hjálpa mér að deila þessum pósti þá yrði ég ykkur mjög þakklát fyrir það og ég vona að sem flestir geti skemmt sér vel yfir þessu veseni mínu.