Það voru einhverjir sem að fylgdust með snappinu okkar í gærkvöldi þar sem María tók völdin. Ég var á meðan í stresskasti í Mosfellsbæ að fara að stíga á svið í einkapartýi og um leið stíga LANGT út fyrir þægindarammann!

Þetta byrjaði með því að í mai, já á þessu ári, var ég beðin um að vera meðlimur í hljómsveit þar sem skortur var á söngkonu. Verandi ekki með nokkra reynslu á söng, fyrir utan tvö námskeið hjá vinkonu okkar Tótu; Siggu Beinteins (sem áttu sér stað í lokuðu rými þægindarammanns!), var þetta soldið út úr kú! Það var nú nógu erfitt að kreista upp nokkra tóna í fyrstu tímunum hjá Siggu en mig hefur alltaf dreymt um að vera með þol og þor í að syngja.. jú jú, einn af mörgum draumum mínum og hobbíum, vissulega!

Nú jæja, ég fæ símtal og þessa beiðni sem ég hélt allan tímann að væri hluti af falinni myndavél! Á hinum enda línunnar er alveg óþolandi sannfærandi einstaklingur sem að nær að plata mig í prufu (ég þakka henni fyrir það í dag því þetta er sjúklega gaman, en ég mun þó aldrei viðurkenna það fyrir henni!) ;)

Eftir nokkra prufutíma tilkynnir bandið að við séum náttúrulega að fara að spila í einkapartýinu í Mosó í ágúst, því það gera þau jú alltaf og jú jú, auðvitað gerum við það...

Bréfpoki, oföndun, panikk ástand, sviti og stress..

..sem var svo betur fer truflað með breytingum á nýju búðinni, svo hausinn náði einhvernveginn ekki að dvelja nógu lengi við þessar fréttir. Svo leið bara tíminn og allt í einu var komið að þessu, DOJ!!

Frumleg og dásamleg garðparadís!

Við fórum með smekkfullan bíl af græjum inneftir í yndislegu veðri og settum upp í þessari líka paradís! Þetta er lögbýli sem er í eigu Stjána og Einars Boga. Býlið er nú komið í að ég held þriðja ættlið og er þar að finna þennan líka léttgeggjaða garð með sundlaug, hænum í höll, hellings gróðurrækt og ótrúlega frumlegum skreytingum! 

Hænurnar búa hér í höllinni og þarna hægra megin undir trjánum er afgirtur garður fyrir þær með allskyns tröppum og dóti sem þær geta leikið sér í.

Þeir sögðu mér aðeins frá þessu hér að ofan. Þarna voru sumsé risastórar aspir sem að skyggðu á garðinn svo þeir tóku þær niður og í staðinn fyrir að farga trjánum söguðu þeir þau niður og ófu um stilkana sem eftir voru. Þannig mynduðu þeir þennan fína skjólvegg og skreyttu svo allt með allskonar dóti, riðguðum gömlum hlutum sem fengu áframhaldandi líf í garðinum!

Hér má einnig sjá allskyns glerdót hanga úr trjánum, brotna leirpotta í moldinni í bland við heila þar sem plönturnar vaxa svo hér og þar. Flippað og furðulegt en um leið svo skemmtilegt!

Þangað voru allir vinir velkomnir með kjöt á stórt tunnugrill, börnin busluðu í lauginni og hljómsveitin steig svo á stokk seinna um kvöldið eftir þónokkra bjóra sem að róuðu taugarnar. 

Þetta var alveg hrikalega skemmtilegt kvöld með dásamlega hressu fólki og þegar við skelltum okkur loks á svið fór stressið hratt og ég get nú tikkað við þetta á "listanum". Ég ruglaðist nokkrum sinnum og vissi að stundum var ég ekki alveg "on point" og svo framvegis og það er ekki eins og ég sé að fara að skipta um starfsvettvang, langt í frá held ég.. en doj hvað þetta var hollt fyrir taugarnar svo ég er komin á þetta:

Elsku þægindarrammi.. þú ert ofmetinn elskan! 

Sköpum okkar eigin hamingju og verum góð við hvort annað kæru vinir!

Ef þér líkaði þessi póstur væri dásamlegt ef þú vilt vera yndi og deila!