A surprise day- simple, easy and cheap fun!

Við systurnar þurfum ekki beint að „búa“ okkur til verkefni, við erum vanalega með nóg að gera í hinu daglega amstri, vinnu og fyrirtækjarekstri. En stundum er gaman að breyta svolítið til og gera eitthvað skemmtilegt!

Hún gaf mér óvissuferð í afmælisgjöf sem að var algjör snilld en María hefur gert þetta fyrir fjölda vina og fjölskyldumeðlima og þetta er alltaf jafn skemmtilegt!

Það var því komið að henni að fá svolítið óvænta ferð svo að þá var bara að plana og skella sér!

Hún var sótt heim um 11:00 um morgun og okkur skutlað upp að Úlfarsfelli í Mosfellsbæ þar sem við fórum út og bíllinn keyrði burt! Það var því ekki annað að gera en að rölta upp hæðina.. eða FJALLIÐ réttara sagt, úff! Þegar ég var við það að falla niður af þreytu stoppuðum við í miðju fjallinu og ég dró rauðan og hvítan dúk (svona köflóttan ekta piknik klút, ég legg ekki meira á ykkur) og skellti í brekkuna ásamt tveimur flöskubjórum!

Ansi hreint notalegt, drukkum ölið og nutum sólarinnar þar til að við vorum við það að krókna á rassinum og héldum við þá aftur af stað.

Kláruðum þá fjallgönguna og upp á topp þar sem við fundum rjúpur, hvítar rjúpur sem vissu ekkert hvað væri í gangi, hvort það væri að koma sumar eða vetur eða hvað væri að gerast og hvað rauðu rassálfarnir væru að gera þarna..

María fékk þá símann minn þar sem ég var búin að setja inn hnit fyrir næstu staðsetningu og hún þurfti að gjöra svo vel og koma okkur á staðinn (ég var mögulega ekki búin að skoða aðstæður nógu vel þar sem ég hafði ekki hugmynd um hvernig við kæmumst á næsta áfangastað, né hversu langt þetta var..)

Við enduðum þó á réttum stað, í Kvosinni með aðstoð áttavita (skátinn í okkur að brillara) þar sem að við skelltum okkur á hádegishlaðborð á Álafoss Kaffi.

Yndislegt umhverfið í Kvosinni og ef þið hafið ekki farið þangað.. farið þá þangað!

Við skoðuðum það sem að var opið, meðal annars hittum við hnífasmið og fengum að skoða vinnustofuna hans sem var öll í skipulögðu kaosi alveg eins og við elskum!

Fórum og fengum þvílíkt flottan túr um Ásgarð og vinnustöðvarnar þeirra! Þetta er náttúrulega dásamlegur vinnustaður og ef þið hafið ekki séð þetta.. sjáið þetta þá líka!

„Ásgarður Handverkstæði var stofnað 1993 og hefur starfsleyfi frá Velferðarráðuneyti sem verndaður vinnustaður. Þar starfa nú 30 þroskahamlaðir einstaklingar ásamt 7 leiðbeinendum.

Ásgarður er vinnustaður sem hefur metnað til að vinna með og þroska hinn manneskjulega þátt vinnunnar. Í því felst m.a. að framleiðslan er löguð að getu hvers og eins, og honum hjálpað við að ná valdi á hugmyndum og verkfærum og vinna með þau. Sem sagt, að taka þátt í sköpunarferli frá hönnun að endanlegri útkomu. Þetta veitir einstaklingnum sjálfstraust, skerpir vilja hans og eykur þolinmæði“. (texti af heimasíðu Ásgarðs).

Þegar hér var komið við sögu gekk ég að húsi með Maríu í eftirdragi og þar í garðinum biðu hjólin okkar læst. Þetta fannst henni merkilegast, að það hefði verið vesenast við að koma hjólunum á staðinn daginn áður, sem var náttúrulega bara ekkert mál en skemmtilega óvænt samt sem áður.

Héðan lá leiðin í sund í Lágafellslaug þar sem að við busluðum í pottinum í ca klukkutíma. Þá var hjólað í Egilshöll (enn og aftur, ég kann ekkert á þetta svæði og gerði mér enganveginn grein fyrir því hvað það var langt á milli, enda vorum við kófsveittar þegar við vorum komnar þangað, vel gert eftir sundið!) Við ætluðum að skella okkur í keilu hér en skipulagið fór aðeins í kleinu þar sem það var allt uppbókað! HA? Kl 18:00 var allt uppbókað, hvernig hefði ég átt að láta mér detta það í hug?! Þannig að við fórum bara á barinn, enda ekkert annað að gera, og biðum eftir því að verða sóttar :)

Það var sossum ekki svo slæmt, við fengum okkur djúpsteiktan disk og var svo skutlað heim til mín þar sem að ég skellti Maríu í bubblubað og við græjuðum okkur fyrir kvöldið!

Að lokum fórum við út að borða þar sem að við skáluðum fyrir vel heppnuðum degi með marðar rasskinnar og harðsperrur í kálfum en lungun full af frísku lofti!

Svona óvæntur dagur er algjör snilld, það er ekkert væl í krökkum um að gera eitthvað annað eða að þau nenni ekki, þau vita ekki hvað er í vændum og finnst allt svo spennandi! Ég held að þetta ætti að vera markmið hjá ykkur í sumar: ferð fyrir vinkonuna/vininn, makann eða fjölskylduna. Þarf ekki að kosta mikið en ótrúlega margt sniðugt hægt að gera:

Hér eru nokkrar hugmyndir sem að ég var búin að láta mér detta í hug:

Hvalasafnið, Badminton, Bogfimisetrið, Grasagarðurinn, kaffi Flóra, Fjölskyldu- og Húsdýragarðurinn, hjóla eða gönguferð um Granda og kíkja á alla staðina þar ss Búrið ostaverslun, skoða gallerýin, borða á The Coocoo‘s nest og fá sér ís hjá Valdísi, miðbæjarferð og hljómskálagarðurinn, Kolaportið ef þetta er um helgi, Nauthólsvík og sjósund, safnaferð á listasöfn borgarinnar, Hafnarfjarðarferð þar sem allt er morandi í galleríum, listasöfnum, veitingarhúsum og skemmtilegum verslunum, Landnámssetrið í Borgarnesi og fara á Bjössaróló eða fara í Friðheima til að skoða tómatræktun og fá fræðslu um hana.

Þetta og svo ENDALAUST margt meira er svo auðvelt að gera, þarf ekki að kosta handlegg en getur verið uppskrift að dásamlegum degi.. eða kvöldi, það er auðvitað líka hægt að koma með vinkonuhópinn í óvissuferð á klúbbakvöld í búðina okkar ;)

Sköpum okkar eigin hamingju og verum góð við hvort annað kæru vinir!

Ef þér líkaði þessi póstur væri dásamlegt ef þú vilt vera yndi og deila!

Katla – Systur & Makar –

Hægt er að fylgja okkur á InstagramFacebookPinterest og Twitter

Einnig bendum við á póstlistann okkar hér.

Veljum íslenska hönnun og íslenska framleiðslu!

Left Versla áfram
Þín pöntun

Karfan þín er tóm